Wednesday, October 21, 2009

Dem boys seh… Every single weeeeek Jagdeo (Mr Hap-pens) out de country

Dem boys seh… Every single weeeeek Jagdeo out de country
October 21, 2009 | By knews | Filed Under Dem Boys Seh, Features / Columnists, News

Dem boys seh that dem does always remember wha Jagdeo seh how dem people at de Waterfalls paper does fabricate story. He went on to say, “Every single day dis hap-pens.”
Dem boys know dat dem Waterfalls paper reportas does have a field day with laughter wid de way how he does seh hap-pens.
Well dem boys seh dem fed up hearing he out de country. “Every single weeeeeeek dis hap-pens”
Dem boys seh up to now he still kyaan find a story dat de Waterfalls paper manufacture but de whole country know he does get away every week.
When is a protest he does get away; when is blackout he does get away; when is de Roger Khan story he does get away; when is questions from reportas he does run away. If is about dem contractors he does hide away.
Yesterday he fly away fuh go to Canada fuh gaff wid some children. He talking bout car does bun.
Every single day something does bun in Guyana. If is not car is house, if is not house is Regent Street. Every single day this hap-pens.
Dem boys rememba that he did want to employ Kerik as he special adviser. That never hap-pen because Kerik get lock up. De same time Bharrat jump pun he plane is de same day a judge decide to hide Kerik in a jail. De judge do de same thing to Bharrat wha he does do to dem reportas.
Talk half. Lef half.

No comments: