Dem boys seh. Third term done fail Mr Yong

Kaieteur News news item, Sunday 18 October 2009 - "Dem boys seh. Third term done fail Mr Yong" - http://www.kaieteurnewsonline.com/2009/10/18/dem-boys-sehthird-term-done-fail-mr-yong/



Some people like hide but dem boys know that moon does run till day ketch am. Dem boys also seh that de longest rope got an end.
Well, Day ketch de Moon that run and start fuh beg people fuh give Bharrat a third term. Donald Ramotar describe de same Moon as somebody “bent on creating mischief.”
People get button and a big note talking about how Bharrat deserve a third term.
People want to know who is this mischief maker and dem even ask Bharrat if he know. Lo and behold is Bharrat friend who start de thing. De man get a contract from Bharrat fuh install cameras at de airport and up to now nuff of dem ain’t wukking.
He get other contracts because de Subway sandwich project that he had fail.
Dem boys seh that is everything he put he hand pun don’t wuk and Bharrat know this suh he tell everybody that he ain’t got any interest in a Third term. He know that it woulda fail.
Dem boys seh that Bharrat had to know who been behind de project fuh a third term. He and de man is buddy friends. He set up de man. Dem does meet at State House steady.
De thing is that all de talk bout mischief and things like that is only Donald in de dark because everybody else know.
Dem boys use to wonder whey de money come from and is now dem know is from a contract. Bharrat give de man a contract fuh campaign, That is wha dem boys seh.
But de thing woulda been a secret. Is ketch dem boys ketch he when he go to post more buttons and slogans. De post master think was some drugs and demand an inspection. De man start fuh resist. He call some big ones but de post master seh that de thing got to open.
A call come from Kwame and de post master insist and open one. Is suh de story buss out.
Dem boys now betting that is done de campaign fuh a third term done.
Talk half. Lef half